लघुकथा- झगडा -नन्दलाल आचार्य

लघुकथा- झगडा

नन्दलाल आचार्य

"तैंले दुलहीसँग किन झगडा गरेको ?" बुबाको सवालको जवाफमा मैले प्याच्चै भनिदिएँ; " म जे गर्न सक्थेँ, त्यही गरें ।"

"बाहिरीया रिस घरभित्र पोखेर हुन्छ त !" उहाँले पुनः प्रश्न तेर्साउनुभयो तर म बोलिनँ ।

"नबोल्नु नै प्रश्नको जवाफ हो ?" उहाँको अर्को कटाक्षको घुयेँत्रो आयो । गन्तव्यमा नपुगेर निष्क्रिय भइरह्यो ।

"झगडाको सम्राट पनि बन्ने र नबोली जित पनि हात पार्ने ?" यसो भन्दै उहाँले थप्नुभयो; "मैले हक्की छोरो पाएको थिएँ; कायर होइन ।"

मैले स्पष्टीकरणमा भनेँ; "सक्ने ठाउँमा झगडा हुन्छ; नसक्ने ठाउँमा करङ सोझ्याउन को जान्छ र ?"

बुबाले अनविज्ञ नजर मतिर तेर्साउनुभयो । मैले प्रष्ट्याउन थपेँ; "दुलहीमाथि रिस फेरेको किनभने यस पालाको बजेट भाषणमा सरकारले मजस्ता जागिरेले खाईपाई आएको भत्ता काटेछ ।"

२०८०/०२/१५ सिद्धार्थटोल, उदयपुर ।